كود -The Lancet//

كشفات دراسة علمية كبيرة نشرتها المجلة الطبية المعروفة The Lancet أن الفقر ما بقاش غير مشكل اجتماعي وللا اقتصادي، ولكن ولى حتى عامل صحي كيشكل تهديد حقيقي للحياة. هاد الدراسة داروها فإطار مشروع Lifepath، ودراسة معطيات ديال أكثر من 1.7 مليون واحد فسبعات الدول متقدمة، ولقات أن الوضع الاجتماعي والاقتصادي الضعيف كينقص من متوسط العمر تقريبا 2.1 عام.

اللي عجيب فالنتائج هو أن تأثير الفقر على طول العمر كان كتر من بزاف ديال عوامل الخطر الصحية المعروفة، الفقر تبين بلي خطر من ارتفاع ضغط الدم (1.6 سنة)، ومن السمنة (0.7 سنة)، وحتى من الطاسة (0.5 سنة). وخا أن الكارو والسكار هما الأكثرية لي كيقتلو بشكل مباشر حسب الدراسة، ولكن الزلط كيبقى عامل أساسي كيساهم فانتشار هاد الأمراض وكيزيد يعمقها كتر.

فسروا الباحثين هاد التأثير الخطير بكون الزلط كيسبب توتر نفسي دايمن، وكيرفع نسبة هرمون الكورتيزول، وكيضر الشرايين وكيأثر على صحة القلب. وزيادة على هاد الشي، الزلط كيحرم بزاف ديال الناس من التغذية الصحية، وكيقلل فرص الفحص الطبي المبكر والعلاج، وهاد الشي كيخلي الأمراض كطور فالسكان حتى توصل لمراحل خطيرة.

خلصات الدراسة بلي السياسات الصحية العالمية، بحال استراتيجية منظمة الصحة العالمية 25×25، كتركز بزاف على العوامل الطبية وكتغفل عامل مهم بزاف وهو العامل الاجتماعي والاقتصادي، ودعات للتعامل مع الفقر بحالو بحال عامل خطر صحي خاصو يتعالج، بحال الگارو ولا ضغط الدم، انطلاقا من سياسات عمومية كتحارب الهشاشة الاجتماعية وكتحسن ظروف العيش، حيث هاد الشي استثمار مباشر فصحة الإنسان.