كود -PLOS BIOLOGY//

الدراسات  فمجال علم الأعصاب بينات بلي التيلاد كيتزاد وهو عندو واحد الحسّ فطري ديال الرياتم ,حتى قبل ما يهضرو ولا يتفاعلو مع العالم، دماغهم كيبدا يلتقط الدبدبات الإيقاعية فالأصوات والموسيقى ،بحث دولي تنشر فمجلة PLOS Biology أكد أن الدراري مني كيتزادو  كيقدرو يتوقعو الإيقاع، ولكن مازال ما كيتفاعلوش مع اللحن.

الدراسة دارت على 49 رضيع فمستشفى جامعي فبودابست، عمارهم بين نهار ويومين ، دراري كانو ناعسين وكيسمعو  لموسيقى بسيطة ديال باخ، ب الباحثين بدلو ستيل ديال  الإيقاع وديال  اللحن، وراقبو تفاعل  الدماغ باستعمال جهاز EEG، اللي كيسجل التفاعل العصبي بلا أي تدخل مؤلم.

النتائج كتقول  بلي كيتبدل الإيقاع على غفلة، دماغ الرضيع كيعطي رد فعل ديال “الاستغراب”، بحال إلى شي حاجة ما جاتش كيف كان هي هاديك ، هاد التفاعل ما بانش ملي كيتبدل اللحن، هادشي كيدل أن دماغ التلاد من الأول مركز أكثر على التوقيت وتنظيم الأصوات، ماشي على الصوت والنغمة .

الباحثين كيشوفو أن الإحساس بالإيقاع عندو جذور بيولوجية قديمة، وقد يكون أساس مهم لتعلم اللغة، تنظيم الحركة، وحتى التطور المعرفي عامة. أما اللحن، فكيحتاج وقت وتجربة وثقافة باش يتفهم. ،هاد الاكتشاف يقدر يكون عندو تأثير كبير فالتربية الموسيقية المبكرة،  والكشف المبكر على بعض صعوبات اللغة والتواصل عند لوليدات.