كود – وكالات //

عدد من المرات كتسمع شي حد سكران فطاكسي ولا فالبار كيهضر بالفرونسي ولا لونگلي، هاد الفكرة معروفة فالثقافة الغربية باسم “الشجاعة الهولندية” (Dutch Courage)، ولي دارت عليها دراسات علمية وأبحاث خلات ماليها يربحو جائزة “إيغ نوبل” (Ig Nobel) ديال علم النفس ف 2025.

الدراسة لي تنشرات فمجلة Journal of Psychopharmacology حاولات تجاوب على سؤال مهم: واش لالكول كيخلي لي سكران يطلق لسانو فاللغات، ولا غير الشراب كيخليك غير جيب الفم وگول؟

الباحثين جمعو 50 طالب ألماني كيقراو فجامعة ماستريخت ولي تعلمو اللغة الهولندية، وقسموهم لجوج مجموعات: مجموعة شربات شي بركة ومجموعة أخرى شربات غير الما.

من بعد، دار كل طالب محادثة لمدة جوج دقايق بالهولندية مع واحد من الباحثين، هاد المحادثات تسجلات وتسمعات لهولنديين أصليين ماكانوش عارفين شكون شرب لالكول وشكون شرب الما.

الطلبة اللي شربو كمية قليلة من الشراب خداو نقاط حسن فالنُطق والطلاقة مقارنة مع اللي شربو غير الما.

العلماء كيقولو بأن السر ماشي غير فالشراب، ولكن فالتأثير ديالو على القلق، بزاف ديال الناس اللي كيتعلمو لغة جديدة كيعانيو من “قلق اللغة الثانية”، وكيبقاو حاضيين كل كلمة قبل ما يقولوها، وكيخافو من الأخطاء ومن حكم الآخرين عليهم.

هاد الرقابة الزايدة كتخلي الكلام يخرج مقطع وفيه تردد، ولكن ملي كيشرب شي حد كمية وخا صغيرة من لالكول، كينقص القلق الاجتماعي وكيولي الكلام يخرج مسرسب ومسرح، ولكن الباحثين كيحدرو من بنادم الا فوت فشراب مغاديش يقدر يهضر حتى بلغتو الأصلية .