كود – وكالات//

ديما كانت فكرة باللي انجذاب الرجال لصدر المرأة غير صناعة ثقافية، جاية من المنع والتغطية وتأثير الإعلام، ولكن دراسة علمية نُشرت فـ2025 فمجلة Archives of Sexual Behavior رجّعات النقاش لنقطة الصفر، وقدّمات معطيات كتقول العكس.

الدراسة دارها الباحث ميشال ستيفانتشيك من جامعة فروتسواف فبولندا، وتركزات على 80 راجل من قبيلة “داني” فبابوا بإندونيسيا، وهي منطقة بعيدة على التأثير الغربي ولكن عرفات مؤخراً انتشار تدريجي لتغطية الصدر، المشاركين تقسمو لجوج: جيل تربّى فبيئة كان فيها الصدر مكشوف، وجيل آخر عاش فمرحلة التغطية.

النتائج كانت كتقول بلي ما كاين حتى فرق كبير بين الجوج فدرجة الانجذاب أو الإثارة للصدر، ولا حتى فالدور ديالو فالجاذبية. هاد الشي كيعني باللي الاهتمام بصدر المرأة ماشي غير نتيجة ديال “المستور‘‘، ولكن حاجة فطرية ومتجذرة.

وزادو بعض الباحثين فرضية أخرى كتقوّي هاد الطرح: ديال علاقة الصدر بالرضاعة، فالطفولة الصدر كيرتبط فدماغ الإنسان بالشبعة، والأمان، والقرب العاطفي، وهاد الذاكرة البيولوجية كتقدر تبقى حتى من بعد البلوغ وتتحول للانجداب.

كاين حتى تفسير تطوري كيقول باللي الصدر كيعطي إشارات على الخصوبة والقدرة على تغذية الطفل الشي لي كيخليه عنصر مهم فاختيار الشريك.