وكالات//

واحد التقرير كيتوقع أن البريطانيين البيضين غادي يوليّو أقلية فالمملكة المتحدة خلال الأربعين عام الجاية، بسبب الهجرة والتغيّرات العرقية اللي كتعرفها البلاد.

وحسب تحليل نشراتو جريدة “تيليغراف”، اللي دار دراسة على معدلات الهجرة، والولادات، والوفيات حتى لنهاية القرن الواحد والعشرين، كيتوقع أن النسبة ديال البريطانيين البيض غادي تهبط من 73% دبا، لـ57% فـ2050، ومن بعد غادي تولي أقلية فـ2063.

هاد البحث دارو البروفيسور مات جودوين من جامعة باكنغهام، وكيقول فيه أنه حتى نهاية القرن، البريطانيين البيض اللي ماعندهم حتى شي أب مهاجر، يمكن توصل نسبتهم غير لـ33.7% من عدد السكان.

وكيتوقعو حتى أن عدد الناس اللي تولدو خارج بريطانيا ولا اللي عندهم على الأقل شي والد مهاجر، غادي يطلع من أقل من 20% دابا لـ33.5% فـ25 عام الجاية.

وبحلول 2100، 6 من بين كل 10 ديال الناس اللي فبريطانيا، يا إما ما تولدوش فيها، يا إما على الأقل واحد من الوالدين ديالهم مهاجر.

وزيد على هادشي، كيتوقعو أن عدد المسلمين اللي دابا كيمثلو 7% من السكان، غادي يطلع لأكثر من واحد من كل 10 (يعني 11.2%) فـ25 عام، ومن بعد يمكن يوصلو لـواحد من كل خمسة (19.2%) حتى لنهاية القرن.