كود -وكالات//

بينات واحد الدراسة جديدة باللي الصيام المتقطع ما كيعطيش نقصان فالوزن كثر من الريجمات الغذائية العادية، المراجعة العلمية قالت باللي الكبار اللي عندهم زيادة فالوزن أو السمنة، ما غاديش يستافدو بزاف من الصيام مقارنة بالنصائح الغذائية التقليدية. السمنة ولات مشكلة كبيرة فالعالم، وعدد الناس اللي عندهم وزن زايد ولاو كتر من ثلاث مرات منذ 1975، وف2022 وصلو 2,5 مليار واحد لي عندهم وزن زايد، منهم 890 مليون عندهم سمنة.

الصيام المقطع، اللي كيعتمد على قلة الماكلة لوقيتة طويلة، ولى مشهور بزاف فالسوشيال ميديا، أشهر طريقة هي تصوم 16 ساعة وتاكل فـ 8 ساعات، وكاين اللي كيدير صيام 24 ساعة جوج مرات فالسيمانات، ولكن الدراسات الجديدة كتقول باللي الفائدة ديالو محدودة وما كتخرجش نتائج كبيرة على الوزن.

الباحثين حللو 22 تجربة سريرية عشوائية فيها 1.995 شخص من أمريكا الشمالية، أوروبا، الصين، أستراليا وأمريكا الجنوبية، وتابعوهم حتى 12 شهر، المقارنة بين الصيام المتقطع والرجمات العادية ما بيناتش فرق كبير. الناس اللي صامو خسرو تقريباً 3% من وزنهم.

الباحثين قالو باللي الصيام المتقطع ممكن يكون مزيان لبعض الناس، لكن اللي كيتروّج عليه فالسوشيال ميديا كتر من القياس، حيث التجارب قصيرة وما كتغطيش وقت الطويل، واغلبها كانت على مشاركين بُيض فالدول الغنية، وما كتعطيش صورة على باقي السكان، خاص مزيد من البحث باش نعرفو النتائج على لوقيتة الطويلة وكيفاش ممكن تستافد من مجموعات مختلفة من الناس حسب العمر والجنس والحالة الصحية.

https://arabic.euronews.com/health/2026/02/16/intermittent-fasting-offers-no-greater-weight-loss-than-standard-diets-study-finds