كود – Nature //

دراسة جديدة دارت على 59 نوع ديال الرئيسيات (بحال البونوبو، الشمبانزي، والمكاك) بينات بلي السلوك الجنسي بين أفراد من نفس الجنس ماشي شي حاجة فيها العجب ، بالعكس راه منتشر بزاف وعندو دور مهم فالحياة الاجتماعية ديال هاد الحيوانات.

الباحثين لاحظو هاد السلوك كيتعاود  عند 23 نوع، والدراسة تـنشرات فمجلة Nature،  كتشرح كيفاش الجنس  ماشي  غير للتكاثر، ولكن حتى وسيلة باش يتنظم المجتمع ديال الرئيسيات.

حسب الدراسة، السلوك المثلي كيبان بزاف فالأوقات لي فيها  ضغط ملي كتكون المنافسة على الماكلة، ولا الخوف من الحيوانات المفترسة، ولا العيش فجماعات فيها تراتبية ،فهاد الحالات، الجنس كيلعب دور بحال “عملة اجتماعية” كتنقص العنف، كتحيد التوتر، وكتعاون يبنيو تحالفات بيناتهم.

فينسنت سافولاينن، واحد من الباحثين، قال بلي الناس عمرهم كانو كيعطيو أهمية لهد النوع من السلوك، مع أنه مهم بحال الأكل ولا القتال ولا تربية الصغار ،وكيأكد بلي بزاف ديال العلماء ما كانوش كيوثّقو هاد الحالات حيث كانو كيشوفوها عيب ، وحتى التمويل ديال البحث فيها صعيب.

الدراسة كتبيّن حتى بلي ما كاينش “جين واحد” مسؤول على السلوك المثلي، لا عند الحيوانات لا عند البشر، ولكن الأمر كيرجع لتفاعل بين الوراثة والظروف الاجتماعية والبيئية ،علماء آخرين علقو على الدراسة وقالو بلي المهم فيها هو أنها كتفكك الفكرة السطحية لي كتقول بلي الجنس عند الحيوانات غير للتكاثر، وكتبيّن بلي الحياة الاجتماعية ديالهم معقدة بزاف، وكتشبه  بعض النواحي للتجمعات البشرية.

https://www.nature.com/articles/s41559-023-02111-y