كود ـ كازا//

إلا كانت عندك قل من 69 راك باقي في متوسط لعمر ديالك، ومابقيتيش تدخلي سيدتي او سيدي فالتصنيف لعالمي ديال الشيخوخة حيت لايف ستايل تبدل والأفكار حتا هوما والشيباني او الشيبانية ليوم راه ولا كيبدا من 69 سنة وعلى حساب طريقة لعيش ديالو، وحسب دراسة بريطانية جديدة، دارتها وحدة بحث تابعة لـMedical Research Council  بشراكة مع باحثين من University College London، واعتمدات على معطيات ديال “British birth cohort” (وحاولو يتبعو نفس الناس من صغرهم حتى كبرو).

وهادشي بين بأن النظرة ديال الناس تبدلات بزاف فهاد السنوات، وولا العمر ماشي غير رقم، ولكن كيرتبط أكثر بطريقة العيش والصحة ديال الإنسان.

يعني واحد يقدر يكون عندو 65 عام وباقي نشيط وخدام وكيعيش حياة عادية، وما كيحسش براسو “شيباني”، وكاين اللي يقدر يحس بالتعب وضعف قبل هاد السن.

وكتوضح هاد المعطيات أن الناس ولات كتربط الشيخوخة بعوامل بحال النشاط البدني، التغذية، والحالة النفسية، ماشي غير بعدد السنين.

وفهاد الإطار، حتى الطب والتقدم فالعلاج، ولبوتوكس وغيرها من الإجراءات التجميلية خلى الناس يعيشو مدة أطول وبصحة أحسن، وبجمال صغر .

بعبارة أخرى، ولات الفكرة ديال “شيباني” ولا “شيبانية” ما كتبداش حتى كيكون الإنسان قرب 70 عام أو حتى فات هاد السن، وهاد الشي كيبين كيفاش تبدلات العقليات والنظرة ديال المجتمع للتقدم فالعمر.

ولمهم من هادشي كامل أنه تقدر ماتبانش كاع إلا الإنسان تهلا فصحتو وفراسو وفطريقة لعيش ديالو.