كود -وكالات//

واحد الدراسة علمية تنشرات فـمجلة علم النفس الفيزيولوجي ف2021 ، كتشير بلي اللمس الزوين والمريح(بالخاطر) كَيخفّف التوتر النفسي وكَيعاون الصحة على المستوى الهرموني والكيميائي.

الباحثة الروسية إيلينا بروسكورنينا والفريق ديالها دارو تجربة على 56 متطوّع بين 18 و38 عام، دّاروا ليهم گلسات التلماس مريحة وفق بروتوكول علمي مضبوط، وطلبوا منهم يقيمو شحال عجبهم  من 1 حتى لـ10.

النتائج وراو بلي هرمون الأوكسيتوسين المعروف بهرمون الارتباط والهنا، طلع بشكل واضح،وزادت القدرة المضادة للأكسدة فالجسم، وهادشي مؤشر مباشر على النزول ديال  التوتر الخلوي ،وزاد المشاركين لاحظوا تحسن  فضربات القلب، وهادشي علامة على تنشيط الجهاز العصبي اللاواعي باش يدخل فحالة الاسترخاء.

الباحثين استنتجوا بلي اللمس الزوين ما كيرخيّش غير الجهاز العصبي، ولكن كيطلق سلسلة تفاعلات بيوكيميائية مضادة للالتهاب، وهادشي كيخليه وسيلة طبيعية فعّالة باش نواجهو الستريس اليومي.

هاد النتائج كتحل الباب باش يُستعمل اللمس العلاجي فـالبروتوكولات النفسية والتأهيلية فالمستقبل.