كود – وكالات//

دراسة علمية جديدة كتقترح أن القلب المزروع ماكيبقاش بالضرورة محافظ على العمر البيولوجي ديالو الأصلي، وإنما كيقدر يتأثر بعمر الشخص اللي تزرع عندو.

الباحثين لقاو أن قلوب المتبرعين الشباب كتشرف دغيا كتزرع عند الناس الكبار، أما قلوب المتبرعين الشيبانين كتقدر تسترجع جزء من شبابها البيولوجي ملي كتزرع عند ناس صغر.

الدراسة، تنشرات فـمجلة«bioRxiv»  وتابع فيها الباحثين التغيرات اللي كتوقع فالقلوب المزروعة عند الفيران، ومن بعد قارنوا النتائج مع حالات زراعة القلب عند البشر.

الباحثين من جامعة هارفارد زرعو قلوب ديال فيران بأعمار مختلفة وسط فيران صغار، متوسطي العمر وكبار، وخلاو القلب الأصلي والقلب المزروع يخدمو بجوج. وبعد أربعة حتى لستة شهور، فحصو الأنسجة ديال القلوب وركزو على تغييرات فـDNA  مرتبطة بالشيخوخة.

النتائج بينات أن العمر البيولوجي ديال القلب المزروع بدا كيتقرب من عمر الحيوان اللي استقبلو. بمعنى آخر، القلب الشاب اللي تزرع عند فأر كبير فالسن بان عليه تسارع فالشيخوخة، أما القلب القديم اللي تزرع عند فأر صغير بان عليه نوع من التجدد.

ومن بعد، قلبو الباحثين على حالات زراعة قلب عند البشر فمستشفى Brigham and Women’s فبوسطن، واختارو 11 حالة كان فيها فرق كبير فالعمر بين المتبرع والمتلقي، وصل فبعض الحالات حتى لـ50 عام.

واللافت، حسب الباحثين، هو أن النتائج اللي بانَت عند البشر كانت مشابهة للي شافوها عند الفئران: القلوب المزروعة بدلات من عمرها البيولوجي باش تقرب لعمر المضيف الجديد.

هاد النتائج كتفتح الباب أمام إمكانية توسيع دائرة المتبرعين بالقلوب، خصوصاً أن الحاجة للأعضاء كتكبر، وعدد المتبرعين باقي محدود.