كود -وكالات//

دراسة علمية بينات بلي كاينة فرق كبير مابين السكتات القلبية عند الرجال والعيالات ، الأرقام كتبين بلي العيالات معندهمش الزهر  بـ14% كتر من الرجال باش يلقاو الإسعاف القلبي الرئوي من شي حد كيكون قريب منهم إلا وقع ليهم سكتة قلبية برا السبيطار، وحسب تحليل دارتو جامعة ديوك الأمريكية على أكثر من 309 ألف حالة، وحتى فمعدل البقاء على قيد الحياة، العيالات عندهم نسبة 22.5% مقابل 36.3% للرجال، حسب دراسة نُشرت فمجلة Circulation، وهدشي كيبان بلي كاين مشكل كبير فطريقة التعامل مع الحالات الطارئة.

باحثين قالو ان السبب هو المونيكات ديال التدريب على الإسعاف، حيث قلال اللي عندهم شكل العيالات ،حيت من بين 20 مونيكة فالسوق ديال الاسعاف فالعالم ، كاين غير 5 مصممة بكسدة ديال العيالات، والباقي عندهم صدر مسطح ديال الدكورة ،الباحثين كيضنو بلي نقص وغياب المونيكات فشكل ديال العيالات ممكن يخلي المسعفين الاقارب ولا المتطوعين خصوصاً الرجال، يترددو ويتلفو فهاد اللحظات الصعيبة وميعرفوش كيفاش يديرو عملية الإسعاف.