كود – وكالات//
إلى كانت كيحسب لك باللي العرس اللي كيتصرف عليه بزاف غادي يضمن زواج ناجح، فدراسة علمية كاتقول العكس، البحث اللي شمل كثر من 3000 كوبل، لقى أن الأزواج اللي كيغرقو فالمصاريف ديال العرس والصداق والعراضة كيبقاو أكثر عرضة للطلاق من اللي دارو عرس على قد الحال.
وحسب المعطيات اللي تداولاتها وسائل إعلام، من بينها PBS News، فالناس اللي صرفو كثر من 20 ألف دولار على العرس، طلع عندهم احتمالية الطلاق حتى لـ3.5 مرات مقارنة مع اللي صرفو ما بين 5 آلاف و10 آلاف دولار، وكاين تحليلات أخرى فالدراسة كتبيّن نسب مختلفة حسب الجنس وعوامل أخرى، ولكن النتيجة هي أنهم كلما كبرات الفاكتورة، ماشي بالضرورة كتكبر فرص نجاح الزواج.
الباحثين وضحو أن المشكل ماشي فالعرس بوحدو، ولكن فالثمن اللي كيخلص الكوبل من بعد، الكرديات وقلة المصروف بسباب العرس المضخم، يقدرو يتحولو مع الوقت لمشاكل يومية، وفبعض الحالات كيكونو بداية النهاية ديال العلاقة.
الدراسة قالت بلي حفلة صغيرة عندها تاثير إيجابي كثر من الحيحة د العرس، وشهر العسل باش ما تقام، كيعزز فرص استمرار الزواج كثر من صرف آلاف الدولارات على ليلة وحدة.