كود – كازا //
حسب المعطيات الجديدة ديال المندوبية السامية للتخطيط، المغرب كيعرف تزعزيع ديمغرافي بالحس، عدد المسنين (فوق 60 عام) تضاعف بزاف فالعشرين عام الأخيرة، من 2,376 مليون سنة 2004 تال 5,027 مليون سنة 2024، والنمو السنوي ديال هاد الفئة كيتسارع: 33,3٪ بين 2004 و2014 و58,7٪ بين 2014 و2024، هاد التغيير كيبين باللي المغرب غادي يولى “مجتمع كبير” وكيحتاج مراجعة السياسات العمومية باش تجاوب مع هاد الوضع الجديد.
العيالات باقين كيشكلو الأغلبية فالفئة المسنة، حيث متوسط العمر عندهم أطول شوية من الرجال. نسبة النساء فهاذ الفئة كانت 52,3٪ سنة 2004، نقصات لـ50,8٪ سنة 2014 ورجعات لـ 51,2٪ سنة 2024. العدد الكبير ديال االشيبانيين أثر على الوزن الديمغرافي، من 7,2٪ سنة 1960 ولى 13,8٪ سنة 2024، وفنفس الوقت نسبة الناس فسن النشاط نقصات، والشباب تحت 15 سنة باقي كينزل.
عدد المسنين مقابل الأطفال تضاعف فـ عشرين عام: من 26 مسن لكل 100 طفل سنة 2004، ولى 52 مسن لكل 100 طفل سنة 2024. مؤشر عبء الإعالة وصل 22,8٪، يعني الضغط على الناس النشيطة فالخدمة زاد بزاف. هاد الوضع كيتطلب تدخل سريع فمجالات الصحة، الحماية الاجتماعية، وبرامج التكافل بين الأجيال.
السبب الرئيسي فهاد التغير هو التقدم فمسار الانتقال الديمغرافي، خصوبة منخفضة، تحسين مستوى الحياة، الزواج المعطل، وزيادة استعمال وسائل منع الحمل، الخصوبة نقصات من 7,2 طفل لكل مراة سنة 1962 لـ 1,97 سنة 2024، أقل من مستوى التعويض الجيلي 2,1. المندوبية كتأكد أن المغرب محتاج سياسات عمومية استباقية باش ضمن كرامة المسنين وتوازن اجتماعي بين جميع الأجيال.
