كود – وكالات //

كشفات دراسة علمية جديدة فمجال علم الأعصاب أن النفاق ماشي غير مسألة أخلاق ولا تربية، ولكن  مرتبط حتى بطريقة الخدمة ديال الدماغ ،الباحثين لقاو باللي منطقة فالمخ سميتها القشرة الجبهية البطنية الإنسية هي اللي كتخلي الإنسان يطبّق داكشي اللي كايآمن به فالحياة اليومية.

الدراسة، اللي تنشرات فمجلة Cell Press، بيّنت أن بعض الناس كايعرفو شنو هو الصح والغلط، ولكن ملي كايجيو يطبّقو هاد المبادئ كايطيحو فالتناقض السبب هو أن النشاط ديال هاد المنطقة فدماغهم كيكون ضعيف، وبالتالي ماكايقدروش يربطو بين الفكرة الأخلاقية والسلوك ديالهم.

الباحثين استعملو تقنية التصوير بالرنين المغناطيسي الوظيفي باش يتبعو كيفاش الدماغ كيتفاعل فمواقف فيها اختيار بين الصدق والمصلحة الشخصية, ولقاو باللي الناس اللي كينتقدو الآخرين وها هما كيغلطو، كيبانو عندهم نقص فالتنسيق بين هاد المنطقة وباقي أجزاء فالدماغ.

لي فشكل هو أن هاد الاتساق الأخلاقي ممكن يتطوّر مع الوقت، يعني الإنسان يقدر يدرّب راسو باش يكون أكثر انسجام بين أقوالو وأفعالو حيت ماشي أي واحد منافق عن قصد، شي مرات كيكون المشكل  حتى بيولوجي فطريقة الخدمة ديال الدماغ.

هاد التناقض كيعكس معركة داخلية بين القيم والرغبات، و بين العقل والمصلحة حيت الاتساق الأخلاقي ماشي حالة ثابتة، ولكن  مجهود يومي كيطلب وعي بالنفس ومحاسبة مستمرة .