كود -وكالات//

بينات دراسة جديدة تنشرات نهار 22 يوليوز 2026 فمجلة Proceedings of the Royal Society B: Biological Sciences، باللي تعناق وتلماس  ماشي غير سلوك إنساني، ولكن عندو جذور تطورية كتوصّل حتى لـ6 ملايين عام.

الباحثين دارو دراسة على 116 شمبانزي وبونوبو فخمسة مجموعات شبه برية وسط محميات إفريقية، وركزو على الخمس دقايق اللي كيسبقو تقديم الماكلة، مني راقبو جميع أشكال اللمس بين القردة، بحال تعناق، والقيسان، وحتى إدخال الصبع ففم قرد آخر، ومن بعد شافو كيفاش كيتعاملو مع بعضهم ملي كتقدم ليهم الماكلة.

النتائج بينات أن القردة اللي كيتبادلو هاد السلوكات قبل الماكلة كيكونو أكثر استعداد ياكلو مع بعضهم بلا مشاكل، ومكيضاربوش مع بعضياتهم وهاد الشي كيدل على أن هاد السلوك كيخفف الستريس وكيعاون على خلق جو ديال الثقة والتعاون.

الباحثين لاحظو سلوك غريب عند ذكور الشمبانزي، وهو مني كيدخلو الأصابع أو اليد ففم قرد آخر، وخا أنه كيبان تصرف خطير، ولكن تعتبر علامة  على الثقة المتبادلة.

الدكتور جيك بروكر من جامعة دورهام قال بلي مقارنة الشمبانزي والبونوبو كتعطينا فكرة مهمة على كيفاش تطور السلوك الاجتماعي عند الإنسان، وأكد أن اللمس كان واحد من أقدم وسائل التواصل قبل ظهور الكلام.

كيف ما تشافت حتى مجموعة ديال ذكور الشمبانزي كيعانقو بعضهم الشي لي كيبين حسب الباحثين أن الإنسان ورث هاد السلوك من ملايين السنين، ومازال كيستعملو باش يحافظ على الانسجام مع الآخرين.