كود – وكالات//

كشفات أكبر دراسة علمية على الـ DNA البشري القديم أن التطور ديال الإنسان تزاد دغيا بشكل سريع فالعشرة آلاف عام الأخيرة، خصوصاً من بعد ما بدات الزراعة.

دارو الباحثين لي على راسهم عالم الجينات ديفيد رايش من جامعة هارفارد، بتحليل معطيات جينومية ديال كثر من 15 ألف واحد من غرب أوراسيا، ولقاو 479 تغيّر جيني تطور بالانتقاء الطبيعي من بعد ما انتشرات الزراعة فأوروبا والشرق الأوسط.

وبينات النتائج، اللي تنشرات فمجلة “نيتشر”، أن الانتقاء الطبيعي أثّر بزاف على جينات المناعة، مني نقص انتشار تغيّرات جينية مرتبطة بالقابلية للإصابة بالسل، وفنفس الوقت تزادت تغيّرات أخرى كتعطي مقاومة لبعض الفيروسات، وحتى الجينات المرتبطة بلون الجلد وتساقط الشعر تبدلات، وهاد الشي كيبين تأثير البيئة والتغذية الجديدة على الموروث البيولوجي ديال الإنسان الأوروبي.

وفالتفاصيل لقاو الباحثين أن واحد التغيّر الجيني المرتبط بارتفاع خطر الإصابة بالتصلب المتعدد زاد انتشر بزاف قبل 6000 عام، ومن بعد بدا كينقص فبعض المجموعات الأوروبية  فالألفي عام الأخيرة، وهاد الشي كيبين كيفاش التغيّر الجيني يقدر يكون نافع فواحد الوقت وضار فوقت آخر، حسب التحديات البيولوجية اللي كاتواجه الإنسان.

كيف ما وتقات الدراسة التطور السريع فعصر البرونز، وهاد الشي ممكن يكون نتيجة لقوة التحولات اللي بدات فالعصر الحجري الحديد، فين تخلاو الناس على الصيد وتقطاع الماكلة من الشجر، وبداو يعيشو فمجموعات زراعية كبيرة، وهاد الشي خلاهم يتعرضو لأمراض جديدة ولمتطلبات غذائية مختلفة، اللي دارت ضغط على الموروث البيولوجي ديالهم.