كود – إل موندو //

دراسة علمية جديدة دارتها إسبانيا نشراتها إل موندو، قلبات واحد الفكرة لي كانت لاصقة عند بزاف ديال الناس، وهي باللي البيرة كتسبب فالزيادة فالوزن، حسب هاد البحث الصبليوني البيرة ماشي هي السبب المباشر للسمنة، إلا تشربات بالقياس دخلات فنظام غذائي متوازن بحال ديال البحر الأبيض المتوسط.

الدراسة ركزات على الناس لي عندهم الوزن زايد، ولقات باللي السعرات الحرارية لي جاية من المشروبات المخمرة قليلة نسبياً، حيث ما كتفوتش 4,5% عند الرجال و2,9% عند العيالات، هاد الأرقام كتبيّن باللي البيرة بوحدها ما يمكنش نحمّلوها مسؤولية زيادة الوزن.

البحث ما كيشجعش على أنك تكثر فالشراب، ولكن كيدعو للاستهلاك المعقول والمسؤول والتحكم فالوزن وأنه ممكن نشربو البيرة ولكن بنظام غذائي مزيان، حركات ديال سبور، راحة كافية، وعلاقة متوازنة مع الماكلة والشرب.

فالأخير، هاد الدراسة كتحاول تحرر الناس من الإحساس بالذنب لي كان مع شُرب البيرة، وكتدعو لنظرة متوازنة، مابين شرب البيرة بالقياس مافيها باس ويلا كان نضام غدائي معها غا يكون احسن.