كود الرباط//

بداو دراري حزب الأصالة والمعاصرة، واللي تابعين للهيلالة ديال وزير الثقافة والشباب مهدي بنسعيد، كيتحركو تحت غطاء مبادرة سميتها “جيل 2030”، كيدّعو أنها موجهة للشباب والمؤثرين والفنانين باش يساهمو فـ تنمية البلاد. ولكن فـ الواقع، كاين معطيات مثيرة وكبيرة على شبهات خرق قانوني واضح.

هاد الساعات الاخيرة، بداو كيوزعو شباب البام الاستمارة الإلكترونية ديال هاد “جيل 2030” كتشبه فـ شكلها استطلاع رأي، ولكن فـ مضمونها كتجمع معطيات شخصية حساسة، بحال: الاسم والنسب + الجنس وتاريخ الميلاد + الجهة والمستوى الدراسي + البريد الإلكتروني ورقم الهاتف + الميولات والاهتمامات الفردية (من التعليم، للصحة، للسياسة…).

لحدود الساعة، ماكاين لا إشعار بكيفاش غادي تستعمل هاد المعطيات، لا شكون غادي يعالجها، لا المدة الزمنية، لا كيفاش يمكن للشخص يحذفها أو يطلب تعديلها.

القانون رقم 09.08 المتعلق بحماية الأشخاص الذاتيين تجاه المعالجة الآلية للمعطيات ذات الطابع الشخصي، كيقول بالحرف: “لا يجوز جمع المعطيات الشخصية أو معالجتها أو استعمالها أو إفشاؤها لأي غرض كان، إلا إذا وافق الشخص المعني بشكل صريح، وتم التصريح بذلك لدى اللجنة الوطنية لمراقبة حماية المعطيات الشخصية (CNDP).”

بمعنى آخر، أي استمارة من هاد النوع خاصها تصريح قانوني عند CNDP، وخص الشخص يعرف شكون غادي يخزن معطياتو، علاش، وشحال من مدة، وفين، وفوقاش يقدر يطلب حذفها أو يسحب الموافقة ديالو.

لكن فـ استمارة “جيل 2030”، ما كاين حتى أثر لهذ الشروط القانونية. وهذا كيعني أن البام، فهاد التحرك، كيتعامل مع المعطيات ديال المغاربة بحال إلى سلعة انتخابية، بلا حسيب ولا رقيب.

فين هي CNDP؟ ..واش حيث البامية وزيرة الانتقال الرقمي مرت رئيس CNDP ميكو عليهم

هاد اللجنة اللي مفروض تكون ساهرة على حماية بيانات المواطنين، ما زال ما خرجات حتى توضيح ولا بلاغ على هاد المبادرة. واش على بالها؟ واش وصلوهم التصريح؟ ولا حنا قدام خرق واضح للقانون كيتغطى بـ “مبادرة شبابية” لاهداف انتخابية طبعا.

هادشي كيزيد يشكك فـ النوايا الحقيقية من هاد العملية، خصوصا وأن السياق سياسي وانتخابي، وبام كيروج ل راسو بانه حزب “رقمي” و“شبابي” باش يرجع يركب على الموجة.

إذا تبين أن هاد المعطيات كتجمع بدون ترخيص ومن غير ما يتم إخبار الناس بحقوقهم، فـحزب سياسي بحجم البام كيكون في وضعية خرق واضحة للقانون، ويمكن تعريضه لعقوبات إدارية وقضائية. وفق القانون.
يشار بلي رئيس لجنة حماية المعطيات الشخصية عمر السغروشني قريب من البام، وهو زوج امال السغروشني، عضو المكتب السياسي للبام ووزيرة الانتقال الرقمي؟.