وكالات//

في واحد المتجر فمدينة أنابوليس، وقع حادث خطير ملي تفركع تليفون بورطابل فجيب واحدة السيدة وهي واقفة قدام لاكيس، وهادشي خلاها تشعل فيها العافية وسط الخوف ديال الكليان.

الكاميرات ديال المراقبة صورات الحادثة لي وقعات نهار السبت لي فات، حيث بانت السيدة واقفة حدا راجلها، وفجأة شعلات فيها العافية. راجلها والمارة جربو باش يعاونو يطفيو العافية.

حسب ما قال راجلها، ماتيوس ليما، لوكالة الأنباء البرازيلية (G1)، هو حيد القميص ديالو باش يطفّي العافية لي كانت كتحرق فحوايج مراتو.

السيدة، لي ما ذكروش اسمها، قالت بللي كانت مصدومة من الحادث، وذكرت أن الهدف من مشاركة قصتها هو باش تحذر الناس من المخاطر اللي ممكن تهدد حياتهم.

السيدة هزوها للسبيطار باش تعالج الحروق لي كانو من الدرجة الأولى والثانية فإيدها وكتفها وضهرها ومناطق أخرى فالجسم ديالها، كما أن جزء من شعرها تحرق. ومن المتوقع أنها تحتاج مزيد من العلاج الطبي لمتابعة حالتها.