هند لكلاوي كود كازا ///

البارح الجمعة 3 يوليوز 2025 ب”سي اف سي =القطب المالي= فكازا (حي المطار سابقا ) بدات الدورة 18 لمهرجان “دجازا بلانكا”. مهرجان بدا نخبوي بالدجاز وقلبها موسيقى العالم من بعد. بدا بفضاءات نخبوية بزاف بحال كولف انفا العليا وهبط من لعلو ديالو ومشى ل”سي اف سي”، الحي الكازاوي الجديد بعماراتو الاعلى فكويزا. 

البارح بدا المهرجان بايقاعات كوبية ل”ال كوميتي” ودخل معاه كناوا. نقل عوالم الصويرة. كانت الشمش وكانو الناس اللي شراو تذاكرهم او معروضين مازال ما جاوش كلهم. من بعد كملات السهرة مع بنت خريبكة الفنانة الراقية هندي زهرة فخشبة “انفا”. هندي زهرة واخا كتغني بالانگليزية مع الامازيغية “ايميك سي ميك” كتبان استمرارية لايقونة الغناء فالمغرب حادة اوعكي. حضورها والتزامها وشخصيتها وتماهيها مع فنها وانفتها وشموخها بحال حادة اوعكي.

غنات وقنعات ودخلات عدد من اللي حضرو من كازاوا فجدبة. 

اخر فنان فيوم الافتتاح كان الامريكي المعروف “سييل”. جمهورو ماشي من جيل اليوم. شفنا كهول ناشطين معاه ومع ايقاعاتو. غناو وشطحو. سهرتو ما كانتش لا بالقوة ولا بالحماسة اللي تسناوها عدد من الحاضرين. عادي مع السنين، “سييل” فقد نظارتو وحضورو فالخشبة. 

من برمجة اليوم الاول بان باللي كاينة الموسيقى وما كاينش الدجاز واخا اسمو “دجازا بلانكا”. 

كاين روح الدجاز فالمهرجان. يمكن المهرجان الثاني فالمغرب بعد الصويرة وهنا بشكل اكثر اللي المغربية تقدر تمشي ليه باللباس اللي بغات وتشطح وتشرب الما او الويسكي. كوكا او البيرا. والماس او الڤان بلان او روج وما يضايقها حد “هنا كنحس براسي حرة” تقول ندى رباطية حضرات للدورات 5 الاخيرة من هاد المهرجان.

“هاد الشي ما كنشوفوه غير فدبي” يقول رجل اعمال بيضاوي معروف ل”كود”. هاد الشي يبين باللي ممكن فبلادنا نكونو “احرار” بلا وصاية حتى حد.
مغرب البارح فافتتاح “دجازا بلانكا” هو المغرب اللي كتبغيه كود. المغرب كما تحبه “كود”. مغرب خالي من الوصاية. مغرب ما كتصدموش بوسة بحب. ما كتزعجوش شابة او شاب بالغ هاز كاس او بيرا. حضرو فيه اللي لابسة اش بغات واللي دايرة الدرة. الجسد حر. اللباس حر. حاجة وحدة مزعجة فهاد المغرب اللي معظمو من الطبقة المتوسطة وما فوق، هو السماح ببيع الكارو فالداخل. السماح بالكمايا الداخل. هادي نقطة كحلا. اللي باغي يتمتع بالموسيقى ما يبغيه شي حد يخنزو بريحة الگارو. 

نقطة اخرى وهي الاقتصار على اولاد هاد الطبقتين. كان ممكن يدخلو السبونسورين ويوجهو دعوات لطلبة الفنون والموسيقى من الناس للي على قد الحال. مغرب كما تحبه “كود” ما يمكنش يكون حكر على اللي عندو الامكانيات