وكالات//

اقتحم دبّ واحد السوبرماركت فوسط اليابان، ودار الرعب وسط الناس اللي كانو كيتقدّاو، وتسبّب فإصابة جوج رجال، وفي بلاصة أخرى لقاو راجل ميت اللي على ما بان أنه تعرّض حتى هو لهجوم من دب، حسب ما قالو المسؤولين وبعض وسائل الإعلام نهار الأربعاء.

فالجابون، عدد الدببة البرية بدا كيزيد بكثرة فهاد السنوات الأخيرة، وحتى فالمناطق اللي ساكنين فيها الناس، وهادشي راجع لعدة أسباب، من بينها تناقص عدد السكان وتغيّر المناخ.

ونهار الأربعاء، لقاو راجل ميت فواحد المنطقة الجبلية فإيواتي (فالشمال ديال اليابان)، واللي كيبان أنه تعرّض لهجوم ديال دب، حسب ما قالت القناة اليابانية   NHK نقلاً عن البوليس.

وفحادثة أخرى، قالو المسؤولين فالبوليس والوقاية المدنية أن دب طولُه تقريبا 1.4 متر دخل لسوبرماركت فمدينة نوماتا، شمال طوكيو، ليلة الثلاثاء، وجرح راجل فعمر السبعينات، وآخر فستيناتو، ولكن الجروح كانو خفاف.

هيروشي هوريكاوا، اللي خدام مسؤول إداري فالسلسلة ديال السوبرماركات، قال لوكالة فرانس برس إن المحل قريب من منطقة جبلية، ولكن ما عمر شي دب قرب ليه قبل هاد المرة.