كود – عثمان الشرقي//

الممثل والكوميدي المغربي الفرنسي جمال دبوز جا للمغرب مع ولدو ليون باش يحضرو كأس الأمم الإفريقية 2025 ويعيشو الأجواء عن قرب، جمال وولدو ما فوتوش الفرصة باش يشاركوا اللحظات ديالهم على إنستغرام، والناس تفاعلو بزاف مع هاد المشاركة، اللي بينات العلاقة القوية بين الأب وولدو وبلادهم المغرب.

جمال معروف بالكوميديا ديالو اللي كتضحك ملايين الناس، غير هو المغرب عندو مكانة خاصة فقلبو، الزيارة ديالو للكان مع ولدو كانت   فرصة باش يعيش الجو الرياضي والثقافي ديال البلاد ويدوزو وقت زوين مع الحباب والصحاب، جمال ديما كيبان قريب من المغرب فكل مبادرة كتهم الثقافة ولا الرياضة، وهادشي كيعطي صورة على تمغرابيت ديالو.

جمال دبوز عندو اهتمام كبير بالكرة المغربية وبالمنتخب الوطني ولهادشي حضر لماتش الافتتاح باش يشجع ولاد الركراكي ومفوتش الفرصة فنفس الوقت باش يتصور مع لي فان ديالو، جمال كيعجبو يتابع المنتخب لي كان شجعو فقطر وعندو علاقات مع بعض نجوم الكرة المغربية والعالمية، الزيارة ديالو للمغرب، كتبين الحب ديالو للكرة والمنتخب والبلاد، وكيفاش الرياضة كتقدر تجمع بين المشاهير والجمهور والفن دقة وحدة.