كود – كازا//

طوموبيل دولوكس كانت ديال الملك محمد الخامس دايرة حالة وسط عشاق السيارات الكلاسيكية. الأمر كيتعلق بـطوموبيل من طراز “Delahaye 180” ليموزين، شراها الملك الراحل ف 1950 وتضاعف ثمنها بـ23 مرة ما بين غشت ونونبر 2022.

هاذ الطوموبيل بقى الملك الراحل كيستخدمها حتى العام اللي مات فيه ومن بعد ورثها الحسن الثاني وباعها ف السبعينات لـ كوليكسيونور أمريكي واللي بدورها باعها وبقات كتدور بين عدد من المالكين. عدد قليل منهم اللي كانو كيعرفو أنها سيارة ملكية، وقبل أسابيع قليلة تأكدات المعلومة بسباب بحث أجرته دار المزادات Hemmings.

وكنتيجة لهاذ البحث، تضاعف سعر الطوموبيل المعروضة للبيع 23 مرة، وتم بيعها آخر مرة من قبل Sotheby’s، ف غشت الفايت، بسعر 318000 دولار، ودابا كتساوي حاليًا 7.5 مليون دولار.