كود سبور//

خرج جلال داودي لاعب الوداد الرياضي على السكات ديالو وكشف شنو وقع له مع فوزي لقجع رئيس الجامعة الملكية المغربية لكرة القدم، فمنصة تسليم الميداليات البارح الأحد بملعب مركب محمد الخامس بالدار البيضاء، بعدما خسر الفريق الأحمر لقب عصبة أبطال إفريقيا أمام الأهلي المصري.

وكذب جلال داودي كل الكلام اللي راج على أن رئيس الجامعة الملكية المغربية لكرة القدم فوزي لقجع غوت عليه أو تناقش معه بسبب خسارة الوداد لقب عصبة أبطال إفريقيا أمام الأهلي المصري، ونشر سطوري قال فيه: “لتصحيح المغالطات لبعض الناس اللي كيكتبو من وحي الخيال ديالهم، الفيديو ديال لقجع ما فيه لا عتاب لا والو بل بالعكس طالبني نرفع راسي وقالي سي با لافان دي موند”.

وكمل جلال داودي وقال: “فعلا ماشي نهاية العالم ولكن حنا كنا باغيين ناخذو اللقب ونفرحو مع الجماهير ديالنا ولكن قدر الله وما شاء فعل وشكرا لجمهور الوداد على الدعم ديالهم”.