كود كازا

حصيلة اعصار “دانا” فالصبليون حسب مسؤولين الجار الشمالي وصلات 158. التوقعات كيف كيقول الاعلام ديالهم كتقول باللي هاد الرقم غادي يرتافع بزاف لانو كاين مناطق مازال ما وصلوش ليها فرق الانقاذ.

فهاد السياق اكدات وزيرة الدفاع الصبليونية مارگاريتا روبلس باللي 500 جندي كيشارك فعملية الانقاذ فجهة ڤلانسيا بوحدها بعد ما ضربها اعصار “دانا”. وسائل اعلام قالت باللي زيد علي هاد الرقم 1200 مكلفين يوصلو الماء والماكلة للمتضررين.  تأكيد جا بعد اعلان الاحوال الجوية باللي غادية تنزل الشتا بزاف فجهات اخرى باسبانيا خاصة النصف الشرقي من الاندلس وجزر الباليار

بالموازاة مع هاد الاعصار اللي ما عمر هاد لبلاد شافت بحالو٬ نقلات وسائل الاعلام تضامن مواطنين جاو من جهات اخرى باش يساعدو المتضررين. شي هاز بالات وشي هاز شطابات… شي جايب معاه الما وشي جايب الدو والماكلة. تضامن كبير بين المواطنين.