كود سبور//

واصل الناخب الوطني وليد الركراكي إثارة الجدل بسبب الاختيارات ديالو، وهذه المرة ملي عيط على الدوزيام گول ديال نهضة بركان المهدي مفتاح لتعويض ياسين بونو اللي توعت.

وليد الركراكي اللي فكل مرة كاتجيه الفرصة كايقول أنه كايعطي الفرصة للشباب فالاختيارات ديالو واللاعبين اللي عندهم تنافسية، حط راسو مرة اخرى فموقف محرج ملي عيط على المهدي مفتاح للمنتخب قبل مواجهة أفريقيا الوسطى الثلاثاء الجاي، اللي عندو 31 عام، وبالتالي هو ماشي حارس مرمى شاب يعول عليه لحراسة مرمى المنتخب فالمستقبل، وثاني حاجة ما عندوش التنافسية حيث ما كايلعبش مع الفريق ديالو.

وكايجي هذا الشي بعد يومين على التصريح ديالو فالندوة الصحافية اللي سبقت ماتش المغرب وإفريقيا الوسطى ضمن الجولة الثالثة من إقصائيات كأس إفريقيا، ملي قال للمدربين ديال البطولة أنهم خاصهم يعطيو الفرصة لحراس المرمى الشباب اللي سن ديالهم صغير، وهنا السؤال، واش ما كانش الركراكي يعيط لگول اتحاد طنجة ريان أزواغ مول الـ17 عام، خصوصا وأنه كايحبس مع الفريق ديالو، ومعيطين له دابا للمنتخب المغربي لأقل من 18عام، مع العلم أن الركراكي قال فنفس الندوة أنه براسو ما كايفهمش شي اختيارات كايديرهم.