وكالات //

ضرب طائر بوجه مراسلة ودار ليها جروح خرج منهم الدم، وهي كتسجّل تقرير اخباري لايڤ من نيوزيلاندا.

وهاد الحادث وقع للمراسلة جيس تايسون لي خدامة فبرنامج “تي آو مع موانا” على قناة “واكاتا ماوري” المحلية، واللي نشرت فيديو فـ”فيسبوك” كيبان فيه اللحظة اللي كانت كتغطي فيها موضوع “الموضة السريعة”، حتى ضربها نورس فجأة فوجهها، وداوها مباشرة لمكتب واحد المؤسسة قريبة باش يديرو ليها الإسعافات.

واحدة الصورة أخرى اللي شاركاتها تايسون باين فيها جرح كينزّف فالجفن ديال عينها اليمنى، ولكن الحالة العامة ديالها كانت مستقرة. وعلقات على الحادث وقالت: “كنت غير كنحاول ندير خدمتي ولكن الطبيعة كان عندها رأي آخر”.

وتدويات تايسون من بعد فبرنامج “توداي” على NBC، وقالت باللي هاد الواقعة هي الأولى من نوعها فالمسار المهني ديالها. وزادت وقالت: “الضربة كانت مفاجئة بزاف، حسّيت بحال شي مخدة ثقيلة ضرباتني فوجهي، ومن بعد بدا الدم كينزل مباشرة”.