كود الرباط//

علمت “كود” من مصدر مطلع أن حسني الغزاوي، اللي عينو الملك محمد السادس، يوم الجمعة 19 ماي 2023، رئيسا للإدارة الجماعية لمجموعة التهيئة العمران، داير بونظيف وسط الشركة.

الغزاوي، الإطار الصارم اللي جا من الشركة الوطنية للطرق السيار، بدا إعفاءات هاد الأيام وسط شركة العمران بسبب تراكم ملفات الفساد والتلاعبات التي همت الصفقات ديال كونطربوند والتكوينات ديال الموظفين.

وحسب مصدر “كود” فقد قرر الرئيس الجديد لمجموعة العمران يعفي أكبر مسؤول نافذ فالشركة ويتعلق الأمر بسعيد مسال، نائب ديال بدر الكانوني المدير السابق للشركة، وتعفا كذلك مسؤول آخر فالشركة سميتو الداودي.

وحسب مصدر ’’كود‘‘، لا حديث وسط أطر الإدارة الجماعية لمجموعة تهيئة العمراني، سوى على تصفية تركة الكانوني للي فشل في مهمة تدبير العمران باعتراف المسؤولين الحكوميين وبشهادة التقارير الرسمية (خصوصا تقارير المجلس الأعلى للحسابات).

مسال لي تعفا كان مع الكانوني فلوزين ديال تكستيل قبل ما يتعين الكانوني فإدارة العمران ويجيبو معه. مسال كان كونطر متر ودبا كيتحكم فالعمران.

كاين لي كيوصفو بالمدير الحقيقي، وكاين اللي كيقول بلي سالات وقتو مع الرئيس الجديد الغزاوي لي عندو  دبلوم مهندس دولة في الهندسة المدنية من المدرسة المحمدية للمهندسين بالرباط.

الغزاوي لقا إرث خايب، تلاعبات فالسكن واختلاسات مالية وفوضى وريع فالصفقات. واش يقدر على الحيثان ويتحالف مع الوزيرة المنصوري اللي ديما كتشكا من هاد الشركة اللي ولات عبء على الدولة؟.

دبا هادي خطوة مزيانة دار الرئيس الجديد مللي عفى شي مسؤولين، واش كافي هادشي بلا محاسبة. واش غايصيفط الملفات الخانزا للنيابة العامة ويتم التحقيق فيها قضائيا.

العمران شركة كتعيش فوضى كبيرة، وتفجرو فيها ملفات تلاعبات كبيرة بالمال العام كيف ما وقع فاكادير وكازا ومراكش وغيرها.