وكالات//

رفعات واحد السيدة، كانت عارضة ومصممة أزياء تركيو، دعوى قضائية ضد راجلها، كطالبو بالطلاق وتعويض مالي كبير، بسبب هدية اعتبراتها مهينة توصلات بها منّو من بعد ما غلاضت.

السيدة اللي سميتها “ميلتيم”، جابت للمحكمة وصل ديال اشتراك ف صالة رياضية، اللي عطاه ليها راجلها فعيد ميلادها، وطلب منها تبدا تدير الرياضة وتنقص من وزنها. هي شافت هاد الهدية إهانة فحقها.

ميلتيم كتطالب بالطلاق وبتعويض مالي شامل كيوصل لـ10 ملايين ليرة تركية (ما يفوق 250 ألف دولار)، النص منه على سبب الإهانة، حسب ما قالت جريدة “حرييت” التركية.

وفنفس الوقت، الدعوى اللي كتنظر فيها محكمة الأسرة فإسطنبول، كتشمل حتى المطالبة بنفقة زوجية شهرية ديال 100 ألف ليرة (حوالي 2600 دولار)، وبيت خاص تسكن فيه، وزيادة على هادشي، الحق فالحضانة ديال ولدهم.

القصة بدات فـ2008، ملي تزوجو، وكانت ميلتيم فديك الوقت عارضة أزياء رشيقة وعجبات “فرات”، اللي خدام مدير فواحد الشركة، وتزوجو وجابو ولد اللي دابا عندو 14 عام.

ولكن من بعد الولادة، ميلتيم زاد وزنها، وراجلها ما بقاتش عاجباه، وكان كيطالبها مرارا باش تنقص وزنها، وهادشي خلا العلاقة ديالهم تولّي فيها المشاكل، وحتى وهي كانت كتجرب باش ترضيه، ما لقاتش نتيجة.