كود -وكالات//

عرفات تايلاند، نهار الجمعة، وحدة من أخطر حوادث إطلاق النار اللي عرفتها المدارس فالسنوات الأخيرة، بعدما تلميذ عندو 14 دار هجوم دموي خلّى على الأقل سبعة قتلى وكثر من 30 جريح، بينهم تسعة حالتهم خطيرة.

وبحسب السلطات التايلاندية، الشاب بدا الهجوم من دار جدودو، فين استعمل فردي ديالهم وقتلهم، قبل ما يمشي لمدرسة ” اللي كيقرا فيها. ومن بعد دخل للأقسام وبدا كيطلق القرطاس.

رئيس الوزراء التايلاندي أنوتين تشارنفيراكول قال بلي الهجوم كان “مخطط ليه مزيان”، وإن المهاجم كان باقي عندو أكثر من 30 رصاصة ملي انتحر، وضاف أن التحقيقات الأولية كتشير بلي كان كيعاني من ضغط مرتبط بالقراية.

عدد من التلاميذ والأساتذة عاشو لحظات رعب، تلميذة قالت بلي كانت واقفة قدام معلمتها ملي تعرضات لإطلاق النار، واضطرت مع صحاباتها يتسلقو سور المدرسة باش يهربو. وتلميذة أخرى صرحت أنها كانت كتسمع الرصاص كيضرب فالأرض فوق القسم اللي كانت فيه، واعتقدت أنها غادي تموت.

الحادث رجّع النقاش على انتشار الأسلحة النارية فتايلاند، اللي كتسجل واحد من أعلى معدلات امتلاك الأسلحة بين المدنيين فجنوب شرق آسيا, رئيس الوزراء أنه غادي يقدم مشروع قانون جديد كيخلي السلاح، غير عند موظفي الدولة مني يكونو خدامين.