كود – وكالات//

أكد الكرملين نهار البارح الخميس 12 فبراير بلي تطبيق واتساب، لي مشهور بزاف فروسيا، توقف حيت الشركة ما بغاتش تلتازم بالقانون الروسي، المتحدث باسم الرئاسة الروسية، ديمتري بيسكوف، قال بلي القرار تطبّق رسمياً حيت واتساب ما امتثلاتش للقوانين المحلية، هاد القرار جا باش موسكو تشجع الناس يستعملو تطبيق محلي ساهل عليهم يراقبوه ويتحكمو فيه.

من جهتها، واتساب لي تابعة لمجموعة ميتا، نددات بمحاولة الحظر، وقالت بلي الحكومة الروسية حاولات تسد التطبيق كامل باش ترمز على المستخدمين يمشيو لتطبيق آخر تابع للدولة. وضافت بلي حرمان أكثر من 100 مليون مستخدم من تواصل خاص ومأمن غادي ينقص من سلامة الناس فروسيا، وأكدات بلي الشركة غادي دير جهدها باش تخلي الناس على اتصال.

حتى تطبيق تيليغرام ما فلتش من هاد الحملة ضد الشبكات الاجتماعية، فالسلطات الروسية كتتهم تيليغرام بلي ما كيديرش مجهود كافي باش يمنع الاستعمال ديالو فـ“أغراض إرهابية”. وولات خدمات بحال ابيل الفيديو فـواتساب وتيليغرام صعيبة بزاف.

فنفس الوقت، السلطات كتروج لتطبيق جديد سميتو “ماكس” طوراتو شركة روسية كبيرة، وكيقدموه كأبليكاسيون فيها كلشي حتى خدمات حكومية وتسوق إلكتروني، ولكن بخلاف واتساب لي كيسيكريزي  المحادثات، “ماكس” ما كيضمنش سرية الرسائل، وهاد الشي خلا بزاف ديال الناس ينتاقدو هاد التوجه ويعتابروه خطوة  باش تزاد  المراقبة.