وكالات//

شعلات العافية نهار الحد ف أوطيل كبير اسميتو “قلب العالم” فحي الجادرية وسط العاصمة العراقية بغداد، وخلف خسائر مادية فالمبنى، ولكن الحمد لله ماكانوش خسائر بشرية.

الفندق “قلب العالم” من الفنادق الجديدة فبغداد، تفتح قبل شي شهور، وكاين فحي الجادرية الراقي، وكان مستعمل فالقمة العربية اللي دارت فـ أبريل اللي فات كمقر لإقامة بعض الوفود الرسمية.

مصادر أمنية عراقية قالت إن الحريق بدا فجأة، وفرق الدفاع المدني مشاو بسرعة للمكان، وبداو يخدمو على إخماد النيران اللي كانت شاعلة فبزاف ديال الطوابق.

العملية ديال الإطفاء طولات ساعات، وقدرو يحبسوا انتشار الحريق ويمنعوه ما يتعداش للمباني اللي حدا الفندق.

فيديوهات اللي خرجات بيّنت اللهب والدخان الكثيف كيطلع من الطوابق العليا ديال الفندق، وصور أخرى ورّات حالة الاستنفار الكبيرة ديال فرق الدفاع المدني وهما كيتقاتلو مع العافية باش يسيطرو على الحريق.