وكالات//

بدات لينا هايدر، بنت ألمانية عندها 12 عام، كتقرا الاقتصاد فجامعة بون، وبهذا دارت واحد الإنجاز نادر وخلاها على الأغلب أصغر طالبة جامعية فالبلاد. لينا سالات قرايتها المدرسية فواحد الوقت قياسي ما فاتو ست سنين، وكملت جميع مراحل الثانوي وهي مازال عندها 11 عام.

وعبّرات لينا على الفرحة ديالها بالتجربة الجامعية الجديدة، وقالت: “كاتعجبني بزاف وحسن من المدرسة”، ووضحات باللي النظام الجامعي كيعطيها حرية أكثر فتنظيم الوقت ديالها، وزادت قالت بلّي المقررات أعمق ومشوقة أكثر من دروس المدرسة اللي كانت كتحس فيها بالملل بزاف.

ولينا معروفة بالذكاء ديالها الكبير، حيث عندها معدل ذكاء طالع بزاف، وهاد الشي خلاها تطلع بسرعة فالسنوات الدراسية: دازت من الأول للخامس، ومن بعد للثامن، فالعاشر، فالحادي عشر، وأخيراً الثاني عشر. وحتى وهي مازال كتقرا فالمدرسة، كانت كتدخّل تحضر فدروس جامعية فإطار برنامج خاص بالطلبة الموهوبين.

وكيقولو الوالدين ديالها بلّي علامات النبوغ ديالها بانُو بكري، حيث كانت كتطلب تقرا كتب طوال وهي مازال عندها عام واحد، وكتعد حتى لعشرة وهي فعمر عامين، وفـ11 عام سالات قراية ’’فاوست” بجزأيه، وهو واحد من أصعب الأعمال الأدبية الألمانية.

وبخصوص حياتها فالجامعة، كتأكد لينا بلّي ما كتحسش بالعزلة رغم فرق السن الكبير بينها وبين زملائها، وكتقول بلّي تعودات من صغرها تعامل مع الناس اللي أكبر منها، وزادت بلّي جوج من صديقاتها كيقراو حتى هما فنفس الجامعة، وقدرات تكون علاقات جديدة بلا صعوبة.