الرئيسية > آراء > دابا بنادم باغي يعيش بالتهريب مكاين لا ضريبة لا عشور وفي نفس الوقت باغي الطريق والمدرسة والسبيطار والكورنيش والجامع والأمن.. سيتة ومليلية جوج تقابي كبار في الإقتصاد الوطني تسدو بقا غير الفساد دابا
07/02/2021 15:00 آراء

دابا بنادم باغي يعيش بالتهريب مكاين لا ضريبة لا عشور وفي نفس الوقت باغي الطريق والمدرسة والسبيطار والكورنيش والجامع والأمن.. سيتة ومليلية جوج تقابي كبار في الإقتصاد الوطني تسدو بقا غير الفساد دابا

دابا بنادم باغي يعيش بالتهريب مكاين لا ضريبة لا عشور وفي نفس الوقت باغي الطريق والمدرسة والسبيطار والكورنيش والجامع والأمن.. سيتة ومليلية جوج تقابي كبار في الإقتصاد الوطني تسدو بقا غير الفساد دابا

محمد سقراط-كود///

تقريبا تمنية دالسنوات وأنا كنبيع ونشري في سوق الحد ديال كاستييخو( الفنيدق)، من ألفين حتى لالفين وتمنية، والواليد راه كثر من تلاتين عام، كنا كنبيعو حوايج الرجال، كنجيبو سلعة كازا نبيعوها في الفنيدق( كانو ناس كيجيو من كازا باش يشريو سلعة جايا من عندهم أصلا)، وكنا كناخدو معانا سلعة سبتة ونبيعوها في الأسواق الأسبوعية ديال جبالة ومن بعد كنا نبيعوها في المعارض في كازا والرباط ومراكش وفاس ومكناس وبزاف ديال المدن، جزء كبير من حياتي دوزتو في الفنيدق كنعرف المدينة مزيان، وكأي مدينة حدودية عايشة بالتهريب والمخدرات والفوضى، فراه تضررات بزاف من إغلاق باب سبتة، لأن داك المنفذ بيه كانت كتعيش المدينة وزوارها كانو كيجيو على ود السلعة، علما أنها كانت تكون مدينة سياحية شاطئية مخيرة، ولكن راه سنوات ديال الإهمال والبناء العشوائي خلاها تكون مدينة مشوهة.

السلعة لي كانت كتدخل من سبتة كانو عايشين بيها ناس المنطقة ولكن في نفس الوقت كانت كتهلك سلعة كازا حيت مكيقدروش ينافسوها، بيجامة كتجي من آخر الدنيا مفصلة مخيطة كتباع في أي سويقة في المغرب بستمية دريال، واكل فيها مول لهري والحمال والبياع والشراي والفراش كلها واخد الربح ديالو فيها، وكانت الجودة مزيانة بمقارنة بالمنتوج المحلي حيت أغلب السلع كانت ديال الشينوا، وكل شرويطة كانت كتدخل من سبتة كانت مغربية من تاونات خدامة في معمل صغير في كازا كتفقد خدمتها، المغاربة كانو شادين معاهم السوق بحاجة وحدة هي تزوير الماركات، عليها حتى سلعة كازا كانو كيخرجو سبتاوا يتقداوها من عندنا، ولكن عموما كانت البلاد لي خاسرة وبزاف ملايير كتضيع على الإقتصاد الوطني مقابل إشتغال ألاف المهربين في ظروف غير إنسانية، عيالات كيضلو يضربو في تمارة والحكرة، أي واحد بعقلو خاصو يكون مع إغلاق كاع معابر التهريب، واخا كمستهلك راه كيكون عندك منتوج زين ورخيص بزاف مقارنة بالمنتوج لي معشر ومخلصة عليه الضريبة.

دابا بنادم باغي يعيش بالتهريب مكاين لا ضريبة لا عشور وفي نفس الوقت باغي الطريق والمدرسة والسبيطار والكورنيش والجامع والأمن، حقا الناس تضررات بإغلاق سبتة ومليلية ولكن راه كازا نتاعشات، وبزاف ديال السلعة ماتفقداتش من السوق ولات كتدخل معشرة، وعوض كانت مرة كبيرة تهز السلعة فوق ظهرها ودفع من هنا دفع من لهيه، ولاو شباب سائقين مهنيين وموزعي سلع كيفرقو هاد السلعة على المحلات وبطريقة قانونية ومحترمة واخا زايدة درهم أو جوج ماعليش، مادام ان مناطق نائية في المغرب ولاو كيتحلو فيها طرقان والضو داخل لأغلب البلايص والأمور غادا، ومدن بحال الفنيدق راه عامر غير بالهجرة أما السكان الأصليين ولاد المنطقة راهم قلال، وداك الهجرة كيف ماجات النهار اللول غادي تمشي عاوتاني تقلب على راسها في جهة خرى، المهم هو مايبقاش الإقتصاد الوطني فيه جوج تقابي كبار كيخرجو العملة، بارتكا غير الفساد.

موضوعات أخرى

06/03/2021 10:31

زعماء الكرطون. واحد فالمعارضة جبان ما قادرش حتى يهدر باسمو وكيسب بنعرفة: كيطلب من لمغاربة يحتارمو التدابير الاحترازية وفريقو جاي للبرلمان. هاد المخلوق نسى باللي حضور البرلمانيين حسمات فيها المحكمة الدستورية

06/03/2021 10:00

ضحية البوليساريو “محمد بريطانيا” كيحكي قصة معاناتو  لـ”كَود”: الجلادين ف الجبهة عذبوني وكلشي كان بأوامر و تواطؤ من النظام الجزائري – فيديو

06/03/2021 09:30

لوبي الجزائر مخلوع من موقف الاتحاد الأوروبي من الصحرا.. و المغرب خدام كيتحرك ف عدد من دول أوروبا الشرقية باش تعتارف بمغربية الصحرا – وثيقة