كود سبور//

اللاعب الإسباني ماتو خوسيلو نجم ريال مدريد الاسباني بطل ماتش روتور الدومي فينال البارح الاربعاء بين الريال وبايرن ميونخ الالماني، مناسب مع صاحبو فالفريق.

وكشفت جريدة “ماركا” الإسبانية، أن ماتو خوسيلو والظهير الايمن ديال ريال مدريد داني كارفاخال مزوجين من جوج خواتات توام، ووضح نفس المصدر، أن خوسيلو مزوج بميلاني كانيزاريس من عام 2016، وهي التويمية خت دافني كانيزاريس مرت كارفاخال اللي مزوجين من 2018.

وتألق ماتو خوسيلو مول الـ34 عام فالدومي فينال بين ريال مدريد وبايرن ميونخ فروتور دومي فينال شومبيونزليگ، حيث قلب الماتش فجوج دقايق بعدما ضرب 2 بيوتا أهلهم بهم الفريق اللي كان خاسر بواحد لزيرو ومقصي، وطلعو للفينال، مع العلم انه جا بريطي لريال مدريد الصيف اللي فات من اسبانيول اللي نزل للقسم الثاني فالصبليون.

والكاريير ديال ماتو خوسيلو، تعتبر متواضعة بالمقارنة مع باقي اللاعبين ديال ريال مدريد، حيث جا للفريق كاحتياطي وصافي واخا الموسم اللي فات كان 3 احسن هداف فلاليگا بـ16 هدف مع اسبانيول، وهذا الشي من اسباب الانتقال ديالو لريال مدريد، واللي تسنا فيه حتى لماتش البايرن ميونخ فروتور الدومي فينال باش يتحول من لاعب مغمور ما كيعرفو حد ومشجع عادي لفريق العاصمة مدريد كيفما أكدت تصويره له ملي مشى يشجعهم ففينال شومبيونزليك 2022 فباريس ضد ليفربول، إلى بطل خارق قدر يحول ريال مدريد من خاسر ومقصي أمام بايرن ميونخ إلى رابح ومتأهل فالمسابقة المفضلة للفريق.