اسماء غربي – كود//

شركة “سيزل” الإيطالية، المتخصصة فإدارة ألعاب الحظ والأداء الإلكتروني، هي اللي ولات مكلفة  بخدمات شركة “اليانصيب الوطني” في المغرب، وغادي تبدا من فاتح يناير 2019 بعقد المدة ديالو 10 سنوات.

جريدة ليزكو “LesEco.ma” دارت ملف خاص على الشركة والطريقة اللي ربحات بيها تسيير اليانصيب فالمغرب وتعمقات فخبايا هاد الصفقة وگاع الخواض اللي دار بيها.

وذكرت ان الشركة المسيرة لليانصيب الوطني بدلات “المناقصة” ديالها وحدفات منها بعض الباساجات وشي وحدين غيراتهم، واخا ماركو كاكافالي، الرئيس ديال “سيزال المغرب” نكر اي معرفة بهادشي.

اضافت الجريدة المغربية اللي كتصدر بالفرنسية ان واحد الفقرة فرعية تم حدفها، وهي الفقرة اللي كتقول ان المغربية للالعاب والرياضة معندهاش الحق تدير العاب اليناصيب، حيت فالحقيقة هاد الاخيرة عندها منتوجات ديال اليناصيب والالعاب الرقمية الافتراضية، وحدفات حتى الفقرة اللي كتفسر الريسك ديال المنافسة مع المغربية للالعاب في التوزيع.

وفي المناقصة ديالها، الشركة المسيرة لليانصيب الوطني، فيكسات اهداف وتوقعات وتبازات على معدل عودة للاعب بنسبة 62%، وهاد النسبة مخالفة للقانون اللي محددها ف 60%.

وختمت الجريدة الملف ديالها بتاريخ الشركة الايطالية الاسود عالميا، فمثلا فالالفينات كانت وسط سكوندال كبير ديال الضرائب فايطاليا، وتحكم عليها بالحبس كاع، وف 2013 محكمة الحسابات الايطالية تابعات سيزال وخلصات هاد الاخيرة فلوس صحيحة، ومؤخرا ف 2017 حطات 12.000 اورو لمحكمة ميلان.

المقال الاصلي:

http://www.leseco.ma/dossiers/72345-loterie-nationale-les-dessous-d-un-appel-d-offres.html