وكالات//

جريمة قتل خايبة بزاف وقعات فـ العاصمة ديال بيرو، ليما، وخلّات الناس فحالة حزن وغضب فمواقع التواصل، من بعد ما لقاو أشلاء ديال شابة فنزويلية سميتها فابيولا، معروفة فـ “تيك توك” بلقب تشاينا بيبي، فـواحد المحطة ديال تصفية المياه. قدرو يتعرفو عليها غير من التاتوهات اللي كانت فجسمها، حيت كانت مختفية من نهار 7 يونيو.

التحقيقات الأولية كتشير أنها تعرضات للخنق، ومن بعد تقطعات، وكاين تقارير كتقول إن الجثة كانت فيها آثار تعذيب، بحال حريق ديال السجائر فرجليها، واللي خلا الناس يوصفو هاد الجريمة بأنها من أبشع ما عرفاتو المدينة فـ السنين الأخيرة.

القصة ديالها بدات من 2022، فاش دخلات فابيولا لبيرو بطريقة غير قانونية مع صاحبها ماينر يوفري خيمينيز كاستريو، اللي مات من بعد فـ حادثة قالو عليها انتحار، ولكن عائلتو ما صدقاتش هاد الرواية واتهمات فابيولا وناس آخرين بأنهم متورطين فالموت ديالو. ومع ذلك، الشرطة ما فتحتش تحقيق ضدها داك الساعة.

مصادر محلية قالت إن فابيولا كانت خدامة فـ مناطق معروفة بسيطرة عصابات فنزويلية عليها، وكيقولو إن القتل ديالها ممكن يكون عندو علاقة بتهديدات كانت جايا من طرف مافيا محلية. بزاف ديال الأخبار كيقولو أنها كانت فـ حفلة الليلة اللي قبل ما تختفي، وممكن يكونو استدرجوها من تما.

لبوليس باقي كيقلب وكيراجع تسجيلات الكاميرات وكيهضر مع الناس اللي كانو كيعرفوها، ووسائل الإعلام فـ بيرو قالت إن البوليس قرّب يوصل لشي نتائج مهمة وغادي يقدرو يعتاقلو المجرمين فـ الأيام الجاية.