كود الجديدة//

تمكنات عناصر الجدارمية فالمركز الترابي ديال خميس متوح بإقليم الجديدة، فالساعات الأولى من صباح اليوم السبت، 29 نونبر، من إحباط محاولة تهريب وترويج كمية كبيرة من المخدرات، فعملية وصفت بـ”الصيد الثمين”.

المعطيات اللي توصلات بها (كود)، كا تقول أن دورية ليلية متنقلة ثار انتباهها واحد السيارة “كات كات” من نوع “فولسفاكن توارگ”، كاتسلك طريق مشبوه وسط الظلام. الدورية تبعات السيارة بشكل دقيق حتى وصلات لدوار العبابدة التابع لجماعة خميس متوح، ومن بعد مطاردة، قدرو يوقفو السيارة.

وبمجرد ما ولات “الكات الكات” محاصرة، السائق هرب وسط الظلام والضباب الكثيف، مستغل الظروف باش يفلت، لكن العناصر ديال الجدارمية قدرو يتعرفو على هويته.

التفتيش ديال السيارة أسفر على حجز 11 كيلو ديال سنابل القنب الهندي (الكيف) و2 كيلو ديال أوراق التبغ (الطابا).

الدرك الملكي فتح محضر تحت إشراف النيابة العامة المختصة، من أجل كشف جميع حيثيات القضية، والوصول للمتورط الرئيسي وكشف الشبكة أو الارتباطات اللي كاينة ورا هاد النشاط الإجرامي.