احمد طيب – كود//

كل مجتمع فيه عدد لا بأس به من المرضى النفسيين والعقول للي ساهل تلعب بيها. داكشي علاش الدولة عندها مسؤولية ديال التقرقيب على المنظرين للإرهاب، وحنا معاها كمواطنين صالحين تانديرو مجهود باش نسلطوالضوء على صحاب خطاب الكراهية والتحريض على العنف.

لحسن الحظ سهالت الدعوة دابا، نقدرو نبلغو على أي حاجة فيها الدغل غير بكليك، وغادي توصل للمسئولين. هادشي للي وقع فعلا ضد الشيخ الكتاني للي مازال تايشعل فالعوافي بتدويناتو. عدد ديال المغاربة دارو الواجب الوطني ديالهم.

خاص ما يحبسش التبليغ. يلا تسنينا ووقع شي هجوم إرهابي غا نكونو كلنا مذنبين وغا نبقاو نتحسرو على شنو كان ممكن يتدار.

للأسف باقي أغلبية المغاربة تايتساهلو مع هاد اللحايا، ما فاهمينش أن بسبابهم يقدر المغرب يخسر بزاف من بعد ماتزادت السمعة الزوينة ديالنا فالعالم. عملية إرهابية وحدة غا تقتل خوتنا وغا تحبس السياحة وغا تهلك الاقتصاد وغا تقلل الأمن فالبلاد.

هادشي كامل ممكن من دابا يلا كلنا بلغنا على هاد مول السوابق فالارهاب اللي دوز الحبس وخدا عفو ملكي. خاص يدار معاه اللازم باش يولي عبرة لكاع هاد النوع للي أجسادهم عايشة معانا وعقلهم عايش فدولة وهمية باغيين يبنيوها بخطاب الكراهية والتطرف.