وكالات //

من بعد مفاوضات استمرات كثر من 12 ساعة، أخيرا، توصل لاعب برشلونة السابق جيرارد بيكيه وصاحبتو السابقة المغنية شاكيرا لتسوية على الحضانة ديال ولادهم من 11 عام ديال العشرة ثم لفراق.

جورنال lavanguardia الإسباني قال إن الاتفاق عطا فيه بيكيه لشاكيرا الحق باش تاخد ولادها ميلان لي عندو 9 سنين وساشا لي عندو 7 سنين باش يعيشو معاها في ميامي فين غادي تنتقل لكن بشروط ثقيلة.

هاد التسوية ماشي فابور، ولكن شاكيرا عطات فيها فلوس صحيحة لبيكيه ما كشفش الجورنال على القيمة ديالهم بالضبط، بالإضافة أنها غادي تخلص عليه الطيارة 5 ديال المرات في العام باش يجي يشوف ولادو من برشلونة لميامي.

وماشي غير هادشي، شاكيرا تنازلات على أي مسؤولية مادية لبيكيه كأب باتجاه ولادو، وقالت إنها غادي تكلف بيهم ماديا وما غاديش تطلب من بيكيه الريال الواحد باش تربيهم أو تقريهم.

وفوق هادشي كامل شاكيرا غادي تفك المشاكل المادية لي على بيكيه في إسبانيا وغادي تخلص عليه 20 في المائة من لكريدي ديالو لي واصل 2.5 مليون دولار، وغادي تبقى تعطيه ولادو يدوزو معاه العطلة مرة في العام.