هناء ابو علي – كود

—

ممكن  جدا  يكون محمد يتيم نسا صفته الحكومية و انتماؤه الى جهاز الدولة التنفيذي، حيث  السيد ف تدوينة جديدة كتبها بمناسبة وفاة الشيخ زحل، السيد مشا بعيد و وصف عبد الكريم مطيع اللي عليه حكم غيابي بالمؤبد و حكمين ، اييه جوج أحكام ، بالاعدام  بسبب تحريضه على قتل و اهدار دم المناضل النقابي عمر بنجلون و غيرها من الجرائم اللي دار تنظيم الشبيبة الاسلامية,وباش تعرفو ان مطيع وجرائمه  خطيرة ولا علاقة بها بسنوات الرصاص ولا ملف حقوق الانسان وانها لا تسقط حتى بالتقادم هو رفضه العودة الى المغرب و  لم يقدم ملفه الى هيئة الانصاف و المصالحة ولم يناقش   ولو لاعادة نفض الغبار على اللي تورط فيه.. وبقا مزال كايدور بين السعودية و ليبيا و لندن و غيرها..

حتى ان تأسيس حركة التوحيد و الاصلاح و حزب العدالة و  التنمية و غيرها   و  عملية ادماج اسلاميي  حركة الشبيبة ف الحياة السياسية كلشي تبنى على اساس واحد وهو  تبرؤهم من مطيع ومن جرائمه  و  خطه الفكري السياسي العنيف وخيانته  للوطن : السيد ف الثمانينات كان ديما كايسب ف اذاعات القذافي و يكفر الملك و الشعب و الاحزاب وماخلا مادار.. هذا هو الاساس اللي السي يتيم وهو وزير يا حسرة  تخلا عليه وضرب كلشي ف الزيرو : التبرؤ من مطيع..

المهم السي يتيم  وصف مطيع بالاستاذ، وان الخلاف معه  خلاف تاريخي انتهى. و السيد لم يعتذر  وديما كيابقا يخربق ملي توصل القضية على شكون حرض على قتل المناضل عمر بنجلون .. ولو بكلمة اعتذار  ولم يعترف باخطاءه اللي اصلا  كل نهار  قيادات الحركة الاسلامية المغربية تقر بها وتقول ” كنا شبابا و اخطأنا” ..

اوا اسي يتيم الا انتهى الخلاف مع مطيع  اللي كتعتبرو استاذك وانت   الان جزء من الحكومة و الدولة ، اوا قل ليه يرجع  ولا توسط ليه يرجع  ولا يتم العفو عليه..وحينها سنرى..

غالبا راه خص شي حد يدير تكوين لوزراء البيجيدي اللي ف حكومة بنعرفة  باش يعرفو الفرق بين تكون مناضل حزبي و رجل دولة و كيفاش تهضر و تتصرف و كيفاش انك الان شخصية عمومية  و ترد البال لصورتك وكلامك.. ومايلقاوش احسن من بنكيران يعلمهم كيفاش يتعلمو يهضرو باسم جميع المغاربة ماشي باسم حزب ولا جماعة صغيرة.