وكالات//
علنات ماليزيا أنها ناوية تمنع استعمال وسائل التواصل الاجتماعي على الناس اللي عندهم أقل من 16 عام ابتداءً من العام الجاي، فخطوة كتهدف تحمي الدراري والشباب من المخاطر ديال الأنترنت.
وقال وزير الاتصال الماليزي، فاهمي فاضل، باللي الحكومة كتراجع الطرق اللي كيتفرضو بها القيود العمرية فالمواقع الاجتماعية فـ أستراليا ودول أخرى، وشدّد على أهمية حماية الشباب من التنمر الإلكتروني، والنصب، والاعتداءات الجنسية على الأطفال.
وزاد وقال فتصريحات نشرتها جريدة “ذا ستار” المحلية: “كنتمنّاو أن منصات التواصل الاجتماعي تلتزم العام الجاي بقرار الحكومة اللي كيمنع اللي عمرهم أقل من 16 عام يفتحو حسابات.”
وهذا القرار جا فواحد الوقت اللي كيزيد فيه القلق فالعالم على تأثير السوشيال ميديا على الصحة النفسية والجسدية ديال الأطفال، بحيث شركات كبار بحال “تيك توك”، “سناب شات”، “غوغل” و”ميتا” كيتعرضو لدعاوي قضائية فـ أمريكا بسبب دورهم فزيادة المشاكل النفسية عند المراهقين.
