وكالات//

فخطوة حاسمة باش تحمي الأجيال الصاعدة من الإدمان ديال النيكوتين، بدات بريطانيا، من نهار الأحد 1 يونيو 2025، تطبق حظر شامل على البيع والتوزيع ديال السجائر الإلكترونية اللي كتستعمل مرة وحدة، من بعد ما ولات هاد المنتجات الملونة وذات النكهات الزوينة منتشرة بزاف بين المراهقين من نهار دخلات للسوق فـ2021.

وزيرة البيئة البريطانية، ماري كري، قالت فتصريحات تناقلتها وسائل الإعلام إن “السجائر الإلكترونية اللي كتستعمل غير مرة وحدة كانت كتوسّخ الزناقي، وكترجع الدراري صغار مدمنين على النيكوتين”، وشدّدت أن هاد القرار داخل فخطة حكومية باش يحميو الصحة العامة والبيئة فنفس الوقت.

هاد النوع من السجائر الإلكترونية معروف بأنه رخيص وفيه نكهات كثيرة كيجبد الشباب، وهادشي خلى بزاف ديال الناس فالمجال الطبي والبيئي يتقلقو، خصوصًا من بعد ما خرجو تقارير كتربط هاد السجائر مباشرة بارتفاع نسبة الإدمان عند المراهقين.

وهاد الحظر ماشي غير على البيع، ولكن حتى على التوزيع، واللي خالف القانون غادي يخلص غرامة فورية توصل حتى لـ200 جنيه إسترليني (يعني تقريباً 269 دولار)، وفحالة عاود خالف القانون، يقدر يوصل حتى لعامين ديال الحبس.