أنس العمري///

علنات شركة “ساوند إنرجي” أنها دارت خطوة مهمة فتطوير مشروع حقل تندرارة للغاز لي كاين فالشرق ديال المغرب.

وقالت الشركة، فبلاغ رسمي، أن هاد التقدم جا بعدما بداو الاختبارات، وتم ضخ أولى كميات الغاز فـ نظام تجميع الغاز  (GGS)، استعدادا لبدء الإنتاج لمدة طويلة فالمحطة الصغيرة ديال الغاز الطبيعي المسال.

وأكدات الشركة أنها توصلات بإشعار من الشركة لي كتقوم بالتشغيل “مانا إنرجي ليميتيد”، لي عندها 55 فالمائة من الامتياز.

هاد الإشعار كيبين، حسب الشركة، أن الأنشطة التشغيلية الأولية لتطوير البئر (TE-5)، هورست بدات رسميا. و”ساوند إنرجي” بقات محتافظة بنسبة 20 فالمائة من هاد الامتياز.

ووضح البلاغ أن آخر قطعة كانت ناقصة فنظام تجميع الغاز، وهي وحدة التحكم والمراقبة (SCADA)، وصلات نهار 28 نونبر 2025. وبعد ما دارو ليها التركيب، بداو يضخو الغاز بنجاح من البئر (TE-6)، وهو الشي لي كيعلن رسميا على بداية المرحلة التشغيلية.

الشركة الإيطالية “إيتالفلويد جيو إنرجي” ((ITF)، هي لي مكلفة بالتصميم والبناء والتشغيل والصيانة ديال المحطة الصغيرة ديال الغاز الطبيعي المسال. وكتقدم حتى ضمانات تشغيلية باش توصل الغاز لشركة “أفريقيا غاز”، لي هي من الشركات الكبرى فالتوزيع الطاقي فالمغرب.

وبيع الغاز مبني على عقد تجاري ملزم لمدة 10 سنوات، كتنص فيه “أفريقيا غاز” على شراء 100 مليون متر مكعب من الغاز سنويا.

المرحلة الأولى من المشروع كتقوم على البئرين (TE-6) و(TE-7)، وزيد عليهوم حفر بئر جديد باش يضمنو الكمية المطلوبة ويحافظو على استقرار الإنتاج طيلة عشر سنوات. وبنفس الوقت، الأشغال جارية فبناء محطة التسييل فالموقع.