كود احمد الطيب الرباط //
عبد الرحيم بن الضو الامين الجهوي لحزب الاصالة والمعاصرة الصديق الحميم لرئيس الوداد السابق سعيد الناصري واللي مضارب اليوم مع صديق سابق صلاح ابو الغالي واحد من القيادة الجماعية للتراكتور ورئيس جماعة مديونة بسباب 6 لگطارات٬ هاد لملايري وفق مصادر “كود” حط محاميه الطيب عمر شكاية ضد صاحبو السابق وهو موجود فالصبليون. هاد الشي يؤكد رواية جات فالبيان الثالث اليوم.
ابو الغالي قال باللي تعرض للتهديد فالاجتماع الشهير وباللي قيادي اخر فالبام واسمو سمير كودار عطى اوامرو لبن الضو باش يدعيه.
فعلاقة بالموضوع كيحاول لملايري مول لفروماج اللي بدا حياتو مهرب كيجيب “بريزيدان” وهي ماركا ديال لفروماج من الشمال ويبيعها فمحلات منها محل ديالو فدرب غلف فكازا٬ واليوم يعد من اكبر لملايرية فكازا٬ كيحاول يورط رئيس الحكومة عزيز اخنوش. علمت “كود” باللي باغيه يدشن وحدة جديدة ومعول على قيادة حزبو يقنعو رئيس الحكومة باش يجي.
هادي باغي يديرها باش يحل مشاكلو مع “لونصا” اللي كانت دارت ليه مراقبة لفروماج انتهت صلاحيتو كانت شركتو جايباه ودخلات الفرقة الوطنية على الخط. وباغي يحل مشاكلو مع الضرائب. فقضية اسكوبار الصحرا كان قال للمحققين علي اموال نقدا عطاها لسعيد الناصري. دابا غادية تكون تحقيقات منين جاب هاد ليسبيس. فيلم اخر بغاه يسالي مع افتتاح اخنوش لمعمل ديالو.
