كود الرباط//

خطة التشغيل لي عطا رئيس الحكومة تفاصيلها، بمنشور يوم الاربعاء 26 فبراير الجاري، شعلات صداع كبير وسط قادة البام.
حسب مصادر “كود” قيادة البام مراضياش على هاد الخطة وكتعتبرها بلي مغاديش تعطي حلول لأزمة البطالة، خصوصا وأن منشور رئيس الحكومة هضر على تقليص معدل البطالة إلى 9%، وإحداث 1,45 مليون منصب شغل إضافي في أفق سنة 2030، في حالة عودة التساقطات إلى مستوياتها العادية.
قادة البام رفضو ربط رئاسة الحكومة حلول البطالة بالسماء والشتاء، مؤكدة بلي الخطة ديال التشغيل كانوا باغين يزيدو يطورو فيها، ولكن الوزير ديالهم المكلف بالشغل يونس السكوري، اتفق مع رئيس الحكومة.
بل مصادر بامية اعتبرت بلي الوزير السكوري كيخدم الاحرار سياسيا وبعيد على مواقف المكتب السياسي للبام، مضيفة بلي المكتب السياسي مدار حتى موقف من هاد الموضوع وحتى موضوع غلاء الاسعار كيتوافق مع نفس كلام نزار بركة امين عام حزب الاستقلال.
ماشي غير البام لي مراضيش ومعجباتوش خطة التشغيل، حتى حزب الاستقلال، فبلاغ اللجنة التنفيذية الأخير، للي تصدر اليوم، مذكرش كاع هاد الخطة ولم يشيد بها، وقصف الحكومة بمطالبتها بتوفير دعم للكسابة.
الاغلبية منقسمة ومشتتة هاد الايام مع هاد النقاش لي داير على الاسعار. مبقاش انسجام.
البام والاستقلال باغين يحملو المسؤولية السياسية للأحرار لأنه كيترأس الحكومة، والاحرار بدوره كيشوف بلي هادي مسؤولية مشتركة ومخصش وزراء البام والاستقلال يتخباو مور النقاش فالفايسبوك وخاص يخرجو يدافعو على اختيارات الحكومة.
فهادشي كامل، كيبان بلي هاد الحكومة معندهاش وزير قادر يدافع عليها، باستثناء فوزي لقجع الوزير المكلف بالميزانية، للي كتلقاه حاضر ف كولشي. من الكورة للمالية للنقاش حول البوطا والدقيق والاسعار.

وكانت الحكومة عبأت، عبر قانون المالية لسنة 2025، غلافا ماليا إضافيا يقدر بحوالي 15 مليار درهم، موزعة على 12 مليار درهم موجهة لتحفيز الاستثمار، عبر مواصلة تنزيل منظومة الدعم المنصوص عليها في ميثاق الاستثمار، والتي تجعل من إحداث مناصب الشغل أولوية لها. فضلا عن مليار درهم موجهة للحفاظ على مناصب الشغل بالوسط القروي، ومليارَي درهم موجهة لتحسين نجاعة برامج إنعاش الشغل.