كود سبور//

تأكد غياب الدولي المغربي إلياس أخوماش لاعب فياريال الإسباني، رسميا على الماتشات ديال المنتخب الوطني المغربي بجوج الجايين ضد كل من الگابون وليسوتو ضمن إقصائيات كأس إفريقيا 2025، بسبب الإصابة الخطيرة اللي تعرض لها البارح السبت مع الفريق ديالو ضد ديبورتيفو ألافيس فبطولة الصبليون.

وخرجو فياريال قبل لحظات من صباح اليوم الاحد، وكشفو على الحالة ديال المهاجم المغربي إلياس أخوماش، وقالو فبلاغ لهم: “عند إلياس أخوماش تمزق كامل فالرباط الصليبي الأمامي والتواء في الرباط الجانبي الداخلي لركبته اليمنى، حسب ما أكداتو الاختبارات الطبية”.

وأكدو فياريال أنهم قريبا غايعلنو على معلومات بخصوص التدخل الجراحي اللي غايديروه لإلياس أخوماش، وهذا الشي كايعني أن الغياب ديالو على التيرانات ما غايكونش قصير.