كود – سبور//

خرج الدولي المغربي السابق الحسين خرجة، اللي كياخد منصب مستشار رئيس الفيفا جياني إنفانتينو، بدفاع قوي على رئيس الاتحاد الدولي لكرة القدم، وقال بلي جزء كبير من الحملة اللي كيتعرض ليها إنفانتينو مؤخراً جاية من أوساط أوروبية خايفة تخسر الهيمنة ديالها على كرة القدم العالمية.

خرجة قال فحوار حصري وطويل مع منصة «SOCCER212»، تنشر السبت، تحت عنوان «كرة القدم ملك للجميع»، بلي صداع لي كان على المشاريع اللي كيقدمها إنفانتينو للاتحادات الوطنية خرج من السياق ديالو.

كيف ما وضح أن رئيس الفيفا غير كيقدم مقترحات للاتحادات، وكل اتحاد عندو الحرية الكاملة يقبلها أو يرفضها، وما كاين حتى شي حاجة كتفرض عليه يدخل فيها.

وحسب خرجة، المنتقدين استغلو هاد الملف باش يهاجمو إنفانتينو والمشروع ديالو، فحين أن الهدف كان هو البحث على استثمارات ومصادر مالية جديدة و إعطاء إمكانيات أكبر للاتحادات الوطنية اللي ما عندهاش نفس القدرات المالية ديال القوى التقليدية فالعالم ديال الكرة.

خرجة مشى أبعد من هاد الشي، وقال بلي الصراع الحقيقي ماشي غير على التمويل، ولكن مرتبط برغبة إنفانتينو باش يخلي كرة القدم أكثر عالمية، ويعطي للدول والاتحادات الصغيرة فرص وإمكانيات أكبر باش تطور المستوى ديالها وتنافس.

وقال بلي هاد السياسة بدات كتقلق جزء من أوروبا، خصوصاً بعدما ولات القارات الأخرى كتقرب تدريجيا من المستوى اللي كانت كتحتكر فيه أوروبا لسنوات طويلة،
ووضح خرجة أن أوروبا «حاسّة بالتهديد» بسبب هاد التحول.

وقال خرجة أن أغلب الهجمات على إنفانتينو، حسب القراءة ديالو، جاية من أوروبا، لي هي جزء من القوى الكروية التقليدية و خايف يفقد البلاصة ديالو مع طلوع اتحادات وقارات أخرى، وشدد على أن «كرة القدم ديال كلشي»،

خرجة انتقد حتى الطريقة المزدوجة اللي كيتعامل بها البعض مع الاستثمارات الخاصة. وقال بلي الأندية والبطولات الأوروبية كتستافد سنوات من استثمارات ورؤوس أموال خاصة وأجنبية كبيرة، ولكن ملي الفيفا كتحاول تلقى مصادر تمويل جديدة يستافدو منها اتحادات خارج الدائرة الأوروبية، مكيبغيوش.

وما وقفش خرجة عند المؤسسات الأوروبية، ولكن وجه كلام قاصح للنجم البرتغالي السابق لويس فيغو، من بعد الانتقادات اللي وجهها لإنفانتينو وطالبو يمشي من رئاسة الفيفا.

واعتبر أن اللاعب البرتغالي السابق ماشي هو الشخص اللي يقدر يعطي دروس فـ«الفلوس والأنانية والكرامة» خصوصا مورا انتقال فيغو ف 2000 من برشلونة لريال مدريد.

وأكد خرجة فالحوار أنه كيعرف إنفانتينو عن قرب وكيخدم معاه، وقال بلي الصورة اللي كيرسموها عليه بعض المنتقدين ما كتوافقش، حسب رأيو الشخصية اللي كيعرفها شخصياً.

وبالنسبة لخرجة، القضية ماشي غير خلاف تقني على التمويل، وإنما صراع على النفوذ والقرار وعلى مستقبل توزيع القوة والثروة وسط كرة القدم العالمية، اما أوروبا اللي سيطرات تاريخياً على اللعبة، ولات اليوم باغية تاخذ بلاصة أكبر داخل المنظومة الدولية