عثمان شرقي ـ ݣود//

خديجة أطلس وبدر وعبي خرجو عمل جديد بعنوان “قلبتي عليا 6/9″، من إنتاج استوديو غازي، واللي خرج نهار 31 أكتوبر 2025 فـ يوتيوب ودار البوز فالساعات اللّولة، وتفرج فيه آلاف المتابعين.

الأغنية جمعت بين الصوت الأطلسي الأصيل ديال خديجة أطلس والطابع العصري فالإيقاع والتوزيع اللي جابو بدر وعبي، وهاكا خرج عمل مغربي بستيل جديد كيجمع بين التراث والتجديد.

الفيديو كليب تصور فـ فندق مشليفن بمدينة إفران، واللي عطاه منظر زوين وسط الجبال والطبيعة. الإخراج كان احترافي، وبيّن انسجام كبير بين الفنانين فالمشاهد  اللي صورت الأغنية.

الجمهور تفاعل بزاف فالسوشيال ميديا، وناس كثار قالو باللي هاد العمل من أحسن إنتاجات استوديو غازي فهاد العام. خديجة أطلس وبدر وعبي شكرُو الجمهور وقالو بلي الهدف ديالهم هو يعطيو نفس جديد للأغنية المغربية  يبقاو محافظين على الأصالة.