احمد الطيب كازا مع و م ع///

الكونفدرالية المغربية للمصدرين خدامة على الملف المصري. هاد ليام تلاقات مع سفير مصر بالمغرب، أحمد نهاد عبد اللطيف. اللقاء اللي كان فكازا هدفو خلق ديناميات جديدة للتعاون بين الدولتين.

الكونفدرالية المغربية للمصدرين، قالت فبيان باللي هاد اللقاء كيندارج ف”إطار مواصلة الحوار رفيع المستوى بين البلدين، ويعكس الإرادة المشتركة لتعزيز العلاقات الاقتصادية الثنائية على أسس أكثر توازنا”.

طبعا كانت ازمة كبيرة بين الرباط والقاهرة على الاختلالات فالتدفقات التجارية. شي كان داير لعصا فالرويضة لشي. لكن تحركات سفيرنا فالقاهرة محمد ايت اوعلي والدينامية اللي دايرها عمر حجيرة كاتب الدولة لدى وزير الصناعة والتجارة المكلف بالتجارة الخارجية٬ حركات امور كثيرة.

حجيرة كان تعين ف23 اكتوبر 2024 فهاد المنصب ودابا ولى مشرف علي هاد الملف مع ملفات اخرى. كانت لقاءات كثيرة باش يذوب ثلج الخلافات.

خدمة الديبلوماسي ايت اوعلي والمسؤول الحكومي حجيرة اللي تلاقات مع ادارة قوية من الجانب المصري بدات تعطي اكلها.

دابا كاينة ف4 ماي 2025 بعثة من رجال الاعمال لمغاربة غادية للقاهرة. رئيس الكونفدرالية المغربية للمصدرين قال باللي السلطات المصرية غتواكب هذه البعثة، خصوصا عبر تنظيم لقاءات ثنائة ( B2B ) موجهة، تهدف إلى تحديد فرص استثمارية وشراكات صناعية مربحة للطرفين.

ومن أجل استعداد مسبق أكثر فعالية، اقترحت الكونفدرالية المغربية للمصدرين تنظيم ندوة “زووم بلد” مخصصة لمصر. وسيوفر هذا الحدث الافتراضي، المقرر يوم 22 أبريل الجاري، للمصدرين المغاربة رؤية واضحة حول خصائص السوق المصرية، متطلباتها، وشروط النجاح فيها.

سفير مصر فالرباط قال باللي السلطات المصرية مستعدة لتيسير التبادلات التجارية وتشجيع الشراكات بين القطاع الخاص المغربي والمصري.